重温经典之万世歌王

Dear Jim：

我承認當初對你起痰，係因為對黃子華有點淡，想找點新鮮感、新刺激。跟你一見鍾情，是在谷德昭的一次talk show，原來一個男人用把靚聲crossover 幽默係咁有power! 我開始留意你，對你著迷。懷著像女孩子跟暗戀多時的男生first date的心情，係《大食騷》與你初次正式見面，確然充滿fantasy。當時睇完個show，真係覺得同你一click即中，興奮級數就如在Google 打上XXX後按「Search」，答案即時出現係第一條thread。自此之後，我決定跟定你，你既約會，我必定赴會，你話一我唔敢話二，還會上你的形體課，諗住近距離跟你打情罵俏，直至你做《男人之虎》，真正得到前所未有既高潮。

來到《萬世歌王》，我同自己講，今次我唔要女上男下，我一定要男上女下，所以水裡水裡去、火裡火裡去，決定用$420打個八折同你盡興一晚，大戰多個回合。一開始，你扮「城城」時，真係一個好好既前戲，真係充滿期待，但為何第一個鐘頭都未過，你就同我講耶穌、傾佛偈! 你知道嗎? 當時我係下面，並唔享受，我重諗到屋企有袋衫聽日一定要拎去磅洗。到我再次投入番，朋友T突然急屎，思緒又再一次飛走，擔心佢痾一篤屎會蝕幾多。但原來我咁諗係多餘，朋友T無蝕底反而有得著，唔使係Intermission時谷住篤屎去大排長龍。到下半場，你間中畀到快感我，但感覺真係好快。然後，在不是太澎湃的興奮底下完了事。0下! 我好似重未黎喎，定係黎左我唔知! 頂呀!

作為你情人，我都鍾意你玩花式，試新野，「仨」我都唔介意，但合適人選真係可遇不可求，而你偏偏要我part著「淋」先生! 終於明白點解倪震看完你的《大娛樂家》後，會用辛辣既文字去評價此劇，當時真係有小小怪佢太直接、怪佢太不近人情，還會覺得係你俾「好勝」梁小姐跣。後來知道，原來罪魁禍首係「淋」某，一個鍾意係巴黎及倫敦細劇場copy & pase既「偽」術家，並只得一少撮人會領略、會投入佢既作品。大佬，香港宜家再唔係上世紀八十年代，再沒多餘錢睇佢既曲高和寡，叫佢唔好將「俊唸」果套搬過黎，那些影像加慢行式般宣洩不滿既行為藝術，只會係歌舞昇平魚翅撈飯時先有人buy，而且，當年buy佢既只係D優皮，優皮宜家都已經變晒皺皮負資產啦!

阿Jim，你有老婆，有個女，唔好再俾人搞你! 求下你，我唔想就咁fullstop我同你既關係，我希望我地之間一直都係comma。下次再見你，唔該你做番你自己，用番你支“不求人”搔番你/我的癢處，就如你今次《萬世歌王》既主題─BE YOURSELF=MESELF!

跟你五年既情婦上

2006年5月27日